【從低谷到世界巔峰嘅輪椅羽毛球夢】

「我要成為我理想中嘅人！」—— 面對體能極限、社會誤解，香港殘疾羽毛球代表陳浩源用汗水改寫輪椅羽毛球嘅歷史，畀世界睇到殘疾運動員嘅專業同價值！

意外改變人生，羽毛球帶佢重新企番起身，並成為世界級運動員！佢由絕望中尋找希望，堅持16年，打破界限，攞下2面殘奧獎牌、2面亞帕運獎牌、6次帕拉羽球世錦賽獎牌，為香港殘疾羽毛球寫下輝煌一頁。

「羽毛球對我嚟講，就係信仰。喺我最低谷、覺得自己無價值嘅時候，羽毛球令我搵返自信，搵返人生意義。」意外受傷，令佢嘅人生瞬間跌落谷底，甚至一度迷失方向。但當佢重新接觸羽毛球後，發現自己即使坐喺輪椅上，只要有公平規則同合適工具，依然可以發揮實力！佢更決定成為香港第一位輪椅羽毛球選手，並將呢項運動推上國際舞台。

2009年，受傷復健兩年後，陳浩源僅訓練9個月，就參加全港周年羽毛球賽冠軍賽，竟然一舉奪冠「呢個冠軍，唔單止係一個獎項，更係重新認識自己嘅開始。佢令我相信——只要肯努力，即使身體有障礙，都可以發光發亮！」憑住呢份信念，佢一步步打入世界頂尖行列，更創下歷史，成為香港首位輪椅羽毛球兩屆殘奧運獎牌得主。

「通常一個運動項目由零開始，需要幾代人努力先可以攞到世界級成就。但我用咗16年，由0去到101！」佢深信：「堅持，會創造奇蹟。當所有人都話你發緊夢，你最後要證明，發夢嘅人唔係你，而係你嘅堅持，改變咗世界。」

輪椅羽毛球唔只係「坐住打波」咁簡單！相比其他輪椅運動，輪椅羽毛球運動員必須自己推動輪椅，每一下移動都消耗大量體力，體能要求極高。作為運動員，佢每日都要進行極嚴格嘅訓練，甚至比一般殘疾運動員更辛苦：「有啲人覺得殘疾運動員唔夠專業，因為無受體制化訓練。但好多健全運動員認識我哋後，先發現——原來真正嘅專業，唔係由身份決定，而係由態度決定。」

香港殘疾運動員嘅支援待遇雖然全球領先，但陳浩源希望殘疾運動唔應該只屬於精英運動員，而應該讓更多普通殘疾人士都可以參與！「日本、韓國都有專為殘疾人士設計嘅運動設施，但香港雖然有無障礙運動場，但依然要同健全人士共用，使用上有一定困難。我希望未來可以成立專屬傷殘人士健身中心，令所有身體有特殊需要嘅人，都可以安全、自在地運動。」

作為曾經站上最高舞台嘅運動員，陳浩源未來希望培養更多年輕運動員，推動輪椅羽毛球發展。佢認為，這項運動目前面臨青黃不接嘅危機，因此希望鼓勵更多年輕人投入：「香港人可以攞到殘奧獎牌，證明香港有能力發展呢項運動，希望佢哋可以接力將呢項運動發揚光大。」

對年輕運動員的建議：「千祈唔好諗住行捷徑，因為呢項運動根本無捷徑。你未必一定要攞獎牌，但最重要係，每日嘅訓練，你都對得起自己！」

「搏盡無悔，真正意思唔係攞到獎之後話自己搏盡，而係即使攞唔到獎，但你已經用盡全部努力，都可以坦然面對自己。」