【足球成就了今天的我】

踢波對於效力傑志嘅顏卓彬（彬仔）嚟講，唔止係職業同熱愛，更加係一個探索世界、擴闊視野嘅機會。「由細細個開始，因為足球我多咗好多機會去唔同國家去踢比賽，同時見識多咗好多。」能夠喺不同國家嘅球場上接觸到各種文化，認識唔同嘅人，呢種體驗為彬仔嘅人生帶嚟好多挑戰同成長：「冇足球，今日嘅我可能會有好大唔同。」

面對挑戰，係對足球嘅熱愛令彬仔一直堅持：「主要係我真係好鍾意踢波！」佢深明做職業足球員唔會永遠都一帆風順，一定會有腳風唔好嘅時候，但佢都好感激有一班一齊由細踢到大嘅隊友陪伴同支持自己。被問到足球生涯中最難忘嘅時刻，彬仔就表示係上年球季足總盃決賽代表深水埗對東方：「其實自己大大小小嘅決賽都踢過，但呢個足總杯決賽係第一個真係由自己第一圈踢到嚟最後一場決賽。」雖然最後加時輸咗三比二，但佢依然好慶幸可以成為呢場比賽入面嘅其中一員。

對於年輕球員，彬仔寄語：「我覺得一定唔可以輕言放棄，因為職業同青年聯賽係有分別，所以絕大部份由青年隊升上職業隊嘅球員初頭都可能會好有挫敗感。我覺得如果你可以係一個職業球隊入邊，不妨向身邊有經驗嘅球員學習。」