【赤腳踢街波長大】

身穿9號球衣、現年28歲嘅基哥利（Rocha Mendes Da Silva Gregory）來自巴西。自小熱愛足球，細細個已經赤腳喺街頭踢波嘅佢，喺2013年展開職業足球生涯。對於足球，佢以「生命」一詞嚟形容：「足球係我嘅生命，同時亦係我實現夢想嘅途徑。」透過足球，基哥利令家人過上更幸福嘅生活，無咩比起呢樣嘢令佢更滿足。

對神嘅信仰同家庭支撐住佢一路走來，佢明白成功路上嘅唔容易，但就算遇到挑戰，佢永遠堅持向前：「我清楚知道自己想要啲咩，同埋可以行到去邊度。」問起足球生涯中最難忘嘅時刻，佢嘅回答係：「而家呢一刻。」喺今個港超球季，基哥利獲得八場比賽八個入球嘅佳績，並當選港超聯「8、9月最佳球員」，毫無疑問會成為佢足球生涯其中一個值得紀念嘅成就，佢亦希望未來可以繼續幫球會贏得更多勝利。

對於年輕一代球員，基哥利勉勵大家：「永遠唔好放棄自己嘅夢想！記住你哋有能力實現一切，只要努力、堅持，並相信自己！」