【乘浪而上．逐夢海上】

由愛上海洋，到今屆世界運動會男子尾波衝浪項目勇奪銅牌 —— 香港代表級 wakesurf 運動員 鄭俊軒，一步一步，乘浪寫下屬於自己嘅傳奇；就好似喺浪上翻滾嘅身影一樣——自由、熱血、充滿勇氣。

佢話自己「同大海一直好有緣」，由細到大就鍾意出海同揸船。21歲嗰年，佢搵到一份揸滑水船嘅工，老闆邀請佢試玩 wakesurf，結果「一試難忘」，即刻墮入呢項運動嘅世界。由一開始每星期落水練習，到後來全心投入訓練，佢話：「嗰刻我好清楚，自己真正熱愛嘅唔係書本，而係大海同挑戰。」

2022年，佢第一次代表中國香港出外比賽，去新加坡參加亞洲巡迴賽，結果贏咗冠軍。「嗰次係我第一次以香港運動員身份出戰海外比賽，成功企上頒獎台，對我嚟講好難忘。」

令鄭俊軒最值得驕傲嘅係，2025年成都世界運動會，尾波沖浪 Skim 板項目首次被納入賽事，而鄭俊軒亦首度披上港隊戰衣出戰世運！面對世界級對手，佢頂住壓力，以較高分數獲得優勝，為香港奪得銅牌。

「嗰面銅牌唔止代表我個人成就，仲係香港 wakesurf 嘅里程碑。」

講起訓練挑戰，佢坦言唔係日日都「浪漫」，「有時練高難度動作會撞牆，愈練愈唔啱feel。2024年世錦賽前，因為過度訓練，導致狀態混亂，愈練愈唔對路，一度陷入迷惘。」最後，佢靠調整心態、重新檢視訓練方向，慢慢搵返平衡：「運動員唔只要練身體，仲要學識管理好心理狀態。」

未來，佢希望可以繼續代表香港出戰更多國際賽，令更多人知道——wakesurf 唔只係玩樂，而係一項認真、專業嘅競技運動。同時，佢創立咗水上體能訓練，希望令更多運動愛好者透過水上運動強身健體：「推動運動發展，都係我嘅人生目標之一。」

「唔好驚走一條唔同嘅路。只要你清楚自己想要乜，願意付出努力，就一定會有機會成功。遇到難題唔好放棄，因為你嘅態度會決定你嘅高度。」

鄭俊軒喺浪上起飛，用行動證明——熱愛可以改變人生，堅持可以掀起屬於自己嘅浪潮。