一來一回之間，考驗嘅從來唔只係速度。細細一張球枱，短短幾秒已足以改變整場比賽節奏；旋轉、落點、節奏變化，每一下都充滿未知。正正係呢種瞬息萬變嘅刺激感，成為港隊乒乓球運動員 李凱敏 最享受乒乓球嘅地方。快到有時要靠本能反應，但同時亦講求極細膩嘅技術、控制力同心理質素。每一板波背後，其實都藏住判斷同博弈，而往往勝負，就取決於嗰一瞬間嘅選擇。

而佢同乒乓球嘅緣分，其實係由姐姐開始。細個時，姐姐先去學打波，李凱敏就經常跟住媽媽去接放學。睇住姐姐練波、比賽，見到粒波飛來飛去，節奏又快又刺激，慢慢令佢對呢項運動產生興趣。成長路上，李凱敏遇到一位對佢影響好深嘅教練。對方雖然嚴格，但一直都好有耐性，亦不斷鼓勵佢進步。細個參加區際比賽同全港年齡分組賽時，開始拎到唔少獎項，成績帶畀佢更大信心，亦令佢更加想突破自己。「慢慢我入咗青少年隊，最後決定走全職競技嘅路。」自此，佢正式踏上全職運動員之路，向更高水平挑戰。

不過，成為運動員之後，真正困難嘅地方先至開始。乒乓球對速度、反應同技術要求極高，每一次訓練都講求細節。對李凱敏嚟講，最艱難嘅挑戰，係心理同技術要同時取得平衡。「技術上要不停微調，拍面角度、步法節奏同發力點，任何細微改變都會影響回球。」但最難嘅，往往係當你嘗試改變時，心理壓力亦會隨之放大。怕失誤、怕辜負教練、亦怕自己努力白費，呢種壓力，相信好多運動員都感同身受。

佢特別提到，有段時間自己曾經想轉用新球拍。平時訓練時明明用得唔錯，但一到正式比賽前，就總係會猶豫，甚至想轉返用舊拍。「其實唔係塊板決定勝負，而係我點樣去適應佢、相信自己去作出改變。」後來佢開始學識，與其不停諗結果，不如專注返每一下動作嘅感覺。當心態慢慢調整好，壓力反而減少，新球拍嘅表現亦逐漸穩定返。呢段經歷，亦令佢真正明白：「技術可以練，但心態先至係決定表現嘅關鍵。」

今年一月，李凱敏喺中東出戰國際賽期間，賽前兩日突然收到爺爺離世嘅消息。「嗰陣真係好沮喪，好想即刻返香港。」不過屋企人一句：「返唔到就喺場上贏返嚟，贏畀佢睇，唔好放棄。」成為咗佢最大力量。帶住對家人同爺爺嘅思念上場，最終佢成功擊敗國家隊對手。對平時甚少喺國際賽擊敗國家隊球員嘅佢嚟講，呢場勝利別具意義。「當下覺得好似爺爺一直喺我身邊支持我。」呢一場，亦成為咗佢最難忘、最值得驕傲嘅比賽之一。

展望未來，李凱敏對自己亦有清晰目標。短期希望今年喺世錦賽打出理想成績，同時爭取入選亞運會同世界盃。除咗成績之外，佢更加希望建立更強信心，學識喺比賽中更穩定咁為自己打氣。至於長遠目標，佢希望將自己嘅打法特點進一步強化，將自己做得好嘅部分精益求精，同時逐步彌補弱點，令整體表現更全面、競爭力更強。「我最想做到嘅，係喺大賽都可以保持冷靜、自信，唔畀壓力影響自己發揮。」對佢而言，每一次訓練、每一場比賽，都係驗證自己、突破自己嘅過程。

最後，李凱敏亦想將一番說話送俾所有努力追夢嘅年輕運動員。「做運動員最重要係堅持同用心。」佢認為：「練習要有計劃，將大目標拆成細小可達成嘅階段性目標；技術要穩紮穩打，唔好急於求成，細節決定成敗。」運動員生涯一定有高低起伏，但最重要係唔好因為一次失敗就否定自己。「You don’t lose, you learn!」跌低唔可怕，可怕嘅係失去再站起身嘅勇氣。最後，記得保持對乒乓球嘅熱愛，當真正享受過程，進步就會更加穩定而持久。

由跟姐姐去睇練波，到今日站上更高水平舞台，李凱敏一直用行動證明，真正嘅成長，唔係從來無失誤，而係每一次懷疑自己之後，仍然願意相信自己、重新出發。

相關文章：由執波開始嘅夢想｜壓力之下打出突破｜吳詠琳：團魂可以創造奇蹟

相關文章：雙重身份嘅堅持｜日與夜之間全力以赴｜袁思偉：追逐目標，成就更好嘅自己

相關文章：逆境中成長．用心打每一球｜譚竣顥：排球唔只係運動，而係我嘅人生導師

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意