對香港田徑代表隊嘅跳高運動員鍾慧欣嚟講，跳高從來唔只係跳得高咁簡單，而係一項需要不停跨越心理關口嘅運動。比賽入面永遠都係以失敗嘅最後一杆作結，但正正如此先會不停令人想追逐下一次更高嘅高度。最初接觸田徑，只係小學時偶然被選中入校隊；升中之後因為身高優勢，先正式開始跳高。雖然已經跳咗足足十五年，但生涯前半段成績一直平平無奇，從來無諗過自己有機會成為全職運動員。大學畢業前，佢決定最後搏一次，唔甘心未發揮到full potential就放棄。佢試過唔同訓練方法，最後終於等到全職機會，一步一步走向專業競技道路。

講到生涯入面最難忘嘅一刻，鍾慧欣即刻諗起上年十二月喺法國一個賽事突破個人最佳嗰一跳！距離上一次個人最佳已經兩年半，期間有過好多氣餒到想放棄嘅低谷。呢場小比賽無乜觀眾，佢都習慣帶住失望心情離開。但係每跳過一個高度，佢突然再次意識到：「無論喺邊度跳、規模有幾細，我都想做到最好。我只係想喺跳高呢條路上向前行繼續進步。」

今次參加全運會，對鍾慧欣個人同埋整個跳高生涯嚟講，意義重大。雖然2023年開始已經不斷出戰亞洲賽事，但全運會係佢第一次參與。最深刻嘅唔係場地或者觀眾，而係運動員嘅心態。佢同國內一眾頂尖選手傾偈之後，先發現自己比賽心態未夠成熟。國內每個月都有好多比賽，大家水平高、競爭大，但每個人都抱住「接受已經發生嘅事，只展望將來點進步」嘅態度。呢種坦然同前瞻，係佢覺得最值得學習嘅一課。

跳高要速度、力量同技術完美配合，訓練過程入面最艱難嘅挑戰就係技術調整。彎道助跑、踏跳、過杆，每一個細節都互相影響。單單改埋助跑起點，就已經可以差好遠。佢話最複雜就係要搵到最適合自己嘅一套配搭，仲要糾正過去十幾年累積落嚟嘅壞習慣，有時感覺就好似要你重新學行路咁辛苦。

展望未來，鍾慧欣短期目標係喺2026年亞洲比賽攞到獎牌，好好喺大型舞台證明自己實力；長期嘅目標希望自己追逐到1.9米，登上世界舞台！

由小學偶然起步，到今日全職跳出屬於自己嘅高度同信念，鍾慧欣一步一跳「跳」出堅持、「跳」出無悔。