【跨越障礙．挑戰極限】
對好多人嚟講，「障礙」係阻礙，但對障礙競技運動員黃敏婷嚟講，障礙反而成為佢生活中最重要嘅部分。每日起身、訓練、見朋友、教學生——全部都離唔開障礙競技運動，已經唔只係興趣，而係佢人生嘅節奏。

最初只係朋友喺網上睇到影片，自己設計咗啲障礙物，叫敏婷幫手試玩。誰知一試就上癮，越玩越覺得有挑戰性。2019年佢膽粗粗參加人生第一次海外OCR比賽，原本只係想見識下，結果喺賽場上見到世界各地運動員嘅實力，感覺自己表現不是很好。嗰一刻，佢決心日後投放更多時間去提升運動表現，做得更好。

喺第二次出戰日本障礙競技運動 Obstacle Course Race (OCR) 100米障礙賽之前，佢同教練定下目標：要比上次快10秒以上。幾個月嘅密集訓練、改善動作：「最後除了能代表香港在賽事中贏到冠軍外，也達成自己及教練的最終目標。」

作為香港少數專業障礙競技運動員，每星期幾乎無休息咁訓練——攀爬、速度、健身、斜路跑樣樣有。但最難唔係體能，而係環境，香港只有一個場地，而且樓底矮、無戶外設施提供訓練，無法模擬OCR 100米障礙比賽環境。要練足全程賽道，只能自費飛海外。即使條件有限，佢仍然堅持珍惜每一次外出練習和比賽的機會。

最近奪得「20至39歲女子組別世界賽冠軍」，敏婷未來目標希望能晉升到世界女子精英組，讓更多香港人認識及支持障礙競技運動。面對平均十五至廿歲嘅對手，31歲嘅佢笑言：「自己起步遲，但我相信努力可以追上。」只要有心，任何年紀都可以突破極限。

「障礙競技運動，本身就係要一關關跨過去。失敗次數往往比成功的次數更多，但只要你相信自己，唔放棄出席每次每一次練習，總會有目標達成的一天。」

從第一次玩到今日成為世界冠軍，黃敏婷用實際行動證明——所謂「障礙」，從來唔係阻擋你，而係成就你。