【逆境中反勝】

剛擔任第12屆世界運動會開幕禮持旗手的香港壁球運動員——劉子均，由 6 歲開始揸拍至今，已經23年。由一個成日喺校園亂跑嘅小朋友，到今日踏足世界舞台嘅專業運動員，佢話：「壁球係我嘅人生導師，教識咗我點面對失敗、分享喜悅，仲幫我搵到人生方向。」

小學時因為太活潑，老師提議佢去試吓打壁球，點知一試就愛上。雖然頭十年成績唔算特別突出，只係香港分齡賽頭八，但佢無放棄。反而因為讀書未算理想，令佢更專心諗：「不如試下全職打壁球。」因為喺比賽擊敗咗港青成員，被體院邀請入隊，正式踏上專業之路。

講到最驕傲嘅一刻，劉子均提到自己第一次打入世界頭 50：「嗰下先覺得自己真係踏實咗。」另一個深刻回憶，係第一次奪得香港冠軍——喺決賽落後之下，最終反勝贏 3:2，嗰份感動，令全家人都熱淚盈眶。最近佢仲成功攞到亞洲冠軍，打破過往亞洲賽「八強止步」嘅魔咒，證明堅持真係會有回報。

專業運動員嘅日常，除咗重複性訓練，仲要不斷面對壓力同失敗。兩年前，佢手腕嚴重受傷，仍然要硬住頭皮為港隊出戰團體賽，九個月只靠「6-7成功力」上陣，痛苦到爆，但仍然頂到落去。佢話：「每一場波就似一份考試，無論勝負，都係運動員必經嘅課題。」

未來，劉子均希望喺新賽季突破世界排名頭 30，更希望喺下屆亞運男子個人賽企上頒獎台，彌補上屆八強止步嘅遺憾。至於最終夢想，當然係奧運：「呢個係全世界壁球人等咗好耐嘅舞台，希望自己有機會踏足。」

「大家一定要相信自己，能力其實遠超過想像。唔駛同人比較，只要唔放棄，努力行落去，總會達成你夢寐以求嘅目標。」

由校園跑到世界舞台，劉子均嘅壁球故事，寫滿咗堅持、拼搏同夢想。支持香港運動員，一齊見證佢哋嘅下一頁。

相關文章：梁子軒：「壁球是我人生啟蒙老師。」
相關文章：何家晞：「壁球是我自信，亦是我與家人情感的橋樑。」
相關文章：何子樂：「儘管曾經跌倒，但每次都能重新站起。」
相關文章：鄧銘漮：「壁球代表我嘅人生。」
相關文章：黃祉謙：「壁球填滿了我經歷的每一頁。」