【與壁球結下不解之緣】

香港壁球運動員何子樂，由7歲開始就同壁球結下不解之緣。由細個開始，放學就練波、假日又會去十八區打比賽：「壁球好似滲透咗喺我生活入面，離唔開。」

由兼讀大學到成為全職運動員，佢話「其實無咩大抉擇」，因為早已立下目標：香港第一、亞洲冠軍、亞運獎牌、世界Top 10！即使學業要攤長6年完成，佢都選擇繼續堅持，2020年順利畢業。

2018年雅加達亞運女子團體金牌，係佢生涯其中一場最深刻嘅比賽。最近更喺第二十三屆亞洲壁球個人錦標賽攞到冠軍，再次證明咗佢嘅實力同堅持！

壁球職業運動員星期一至六都需要訓練，一星期至少11節訓練，受傷在所難免。有時未復原就要上場、有時訓練得好好但比賽表現未如理想，呢啲時候心理質素好緊要：「會感到沮喪，會懷疑自己，但做運動員就係需要自己克服，克服傷患、困難、失敗，而再企返起身再奮鬥過！」

8月將首次出戰世界運動會，佢希望攞到好成績。而長遠目標仍然係提升世界排名，目前最高排名21，仍然不斷努力緊！

「最緊要搵到自己鍾意做嘅嘢，然後投放時間、努力同心機。雖然試咗未必得，但係唔試就一定唔得！唔好畀自己後悔，加油！」

相關文章：梁子軒：「壁球是我人生啟蒙老師。」
相關文章：何家晞：「壁球是我自信，亦是我與家人情感的橋樑。」