對香港劍擊代表隊嘅運動員梁千雨嚟講，劍擊從來唔只係鬥快鬥狠咁簡單，而係一項結合力量、速度，同埋滿滿mind game嘅運動。由細個開始，佢已經好鍾意玩劍擊。除咗享受贏嗰份痛快，佢更加珍惜同強勁對手交鋒嘅機會。就算輸咗，佢都會將每場失利轉化成學習機會，透過分析同改進，持續提升自己嘅實力。對佢嚟講，輸從來唔係終點，而係升級嘅起點。正正因為呢份對進步嘅渴望，令佢由細到大都好清楚，自己想全心投入劍擊，行到更遠。

講到最難忘嘅一刻，梁千雨即刻諗起2024國際劍擊聯會花劍世界盃 - 中國香港站攞到團體冠軍嗰日。嗰日每一場波都打得超好，對住嚟自世界各地嘅高手，我哋香港隊竟然可以逐個擊破，打完之後自己都覺得好難以置信：「我相信呢個係一個我值得自豪嘅時刻！」

今次全運會，對梁千雨嚟講係人生第一次參加大型綜合運動會盛事，而且仲係喺香港主場舉行！雖然個人賽表現有啲失準，但團體賽成功攞到金牌，已經係一個好完美嘅開始。佢話：「希望之後再有機會參加運動會，都可以有更好嘅表現同成績。」最打動佢嘅，係全運會嗰種氣氛，大家好支持港隊，好落力咁為我哋打氣，令佢由衷感動。

做職業運動員，最艱難嘅挑戰唔係訓練幾辛苦，而係要保持一個健康嘅身體。梁千雨好坦白講到：「相比起練到好攰，病或者受傷嘅感覺更加難受。」因為一受傷，就無得全心投入訓練，又要擔心練得多會唔會令傷勢惡化。所以佢一直都學緊點樣保護自己，佢最常掛喺口邊嘅一句就係：「人無事，先可以做到世界冠軍。」呢句說話，聽落簡單，但係好多運動員都深有體會。

講到未來目標，梁千雨眼神變得更加堅定：「我希望喺世界賽可以攞到個人獎牌。」雖然最近幾場比賽表現唔係太理想，但佢視之為寶貴學習同經驗：「只要繼續努力、繼續調整，我相信我可以突破自己，發揮到更好嘅水平。」

最後，梁千雨想同所有追夢嘅年輕人講：「請記得盡情享受追夢嘅過程，搏盡無悔。」由一份純粹嘅喜愛開始，到打併出屬於自己嘅全運會金牌，梁千雨一步一步「劍」出信念、「劍」出堅持。

相關文章：羅浩天：「堅持自己鍾意嘅嘢，先無悔無憾。」

相關文章：【何思朗：「有夢就要追！」

相關文章：香港劍擊四大名將：張家朗、江旻憓、何瑋桁、陳諾思

相關文章：體育學堂 ：劍擊101 (上)

相關文章：【體育學堂 ：劍擊101 (下)