【武術精神．勇闖世界】

今屆世運會勇奪武術散打銀牌——香港武術運動員 張溢霖，從小被李小龍、成龍、葉問嘅電影吸引，11歲開始接觸散打，從模仿招式到專業培訓，武術對佢嚟講唔止係一項運動，更係一種「武德」——武止惡、揚善。佢話：「我從細好有憧憬去模仿武打類型嘅影片，能夠透過散打去鍛鍊身心，好自然就決定踏上專業道路。」

2023年，美國第16屆世界武術錦標賽，係佢印象最深刻嘅一戰。比賽前壓力巨大，比賽當時仲要調整時差，狀態都唔係太好，但張溢霖靠住教練嘅鼓勵同自己堅持：「最後過五關斬六將下進入四強，最後奪得第三名成績，達成咗我俾自己嘅目標，所以我覺得那次比賽係我最印象深刻嘅時刻。」

作為專業運動員，張溢霖認為最難嘅唔係身體上嘅疲累，而係心理挑戰。「攰嘅時候會想偷懶、請假，但我會用音樂或者勵志影片調整自己，克服心魔先至可以完成訓練。」佢坦言，正因為細個嘅偷懶經驗，令佢明白心理堅持對成績嘅重要性。

張溢霖下一個目標係2026年日本名古屋亞運會。過去錯失兩次機會，今次佢希望唔止參賽，更希望可以躋身前三。「我一直提醒自己，錯過唔代表放棄，只要繼續努力，夢想終會實現。」

張溢霖話：「做運動員唔容易，我堅持咗12年先攞到人生第一個世錦賽獎牌。年輕運動員唔好因為短期挫折而放棄，只要堅定目標，努力向前，一定可以攞到屬於自己嘅成就。」

張溢霖嘅武術之路，充滿汗水、挑戰同堅持，每一步都係成長嘅痕跡。