飛越沙池．突破紀錄｜陳銘泰：有時最重要唔係完美準備，而係正確心態。

發布日期: 2026-03-12

對香港田徑代表隊跳遠運動員陳銘泰嚟講，跳遠唔只係衝刺再起跳咁簡單，而係一項要同自己不斷較量嘅運動。由助跑速度、踏板時機，到空中姿勢同落沙，每一跳都係速度、力量同技術嘅完美配合，但同時亦係心理嘅挑戰。

其實佢接觸田徑嘅經歷，同好多香港小學生一樣，都係由小學陸運會開始。因為比賽有成績，自然對田徑產生興趣，再加上遇到一位好教練，每一年都見到自己有進步，慢慢就愛上咗跳遠。嗰種每次突破自己嘅滿足感，令佢愈跳愈投入。真正嘅轉捩點，出現喺中六學界賽。嗰一年佢第一次打破香港紀錄，突然意識到自己原來有能力代表港隊出戰亞洲賽甚至世界賽。完成DSE之後，佢喺大學一年級正式加入體院，踏上每星期訓練六日嘅全職運動員之路，亦開始向「8米」目標進發。

（圖片來源：受訪者提供）

講到生涯入面最難忘嘅一刻，佢提到2023年亞洲田徑錦標賽跳遠決賽。相隔六年，再一次喺大賽入面兩次跳過8米。對佢嚟講，呢兩跳唔只係成績，更加係多年努力嘅證明。由訓練、低潮到重新站起嚟，每一步都有人陪伴同支持，所以呢個時刻亦係佢想感謝身邊所有人嘅一刻。

唔經唔覺，陳銘泰已經參加到第四次全運會。由當年隊入面嘅後輩，到而家成為隊中嘅「老大哥」，時間悄悄咁過去。令佢最深刻嘅，其實未必係比賽本身，而係身邊嘅人。無論係香港隊隊友，定係來自其他地方嘅跳遠對手朋友，大家都陪伴住彼此經歷運動員生涯，但亦有唔少人逐漸退下嚟。當佢回頭望，發現自己依然仲喺跑道上堅持緊，呢份感覺反而更加深刻。

（圖片來源：受訪者提供）

如果講到訓練入面最大嘅挑戰，佢坦言其實唔係技術，而係心理調整。因為比賽時嘅壓力同節奏，永遠無可能100%喺練習入面模擬得到，只可以盡量做好準備。佢人生最戲劇性嘅一場比賽，就發生喺歐洲。星期六晚喺法國完成一場成績唔理想嘅比賽，但12小時之後仲要趕去另一場賽事。期間仲要經歷6小時交通，由法國轉2次車去瑞士，休息嚴重不足，前一日仲觸及腳踭傷患。原本完全無期望，但偏偏喺最後一跳，佢跳出5年以來第一次8米成績。呢次經歷令佢深深體會到：運動成績有時未必需要最完美嘅準備，反而係當心態調整好，往往會出現意想不到嘅突破。

展望未來，佢而家最重要嘅目標就係2026年日本名古屋舉行嘅亞運會。呢亦係佢同教練Animo重新合作之後嘅首個大目標。佢希望可以再次突破自己保持嘅香港紀錄，用全新技術去證明自己仍然可以再進一步。