由一個單純覺得「跆拳道好型」嘅女仔，到今日企喺世界跆拳道排名第三位嘅中國香港運動員，江麗莉一腳一腳踢出屬於自己嘅位置。呢個排名，唔只係一個數字，而係無數次訓練流汗、比賽受傷、取捨與堅持累積而成嘅結果。正如江麗莉所講：「跆拳道，代表住我嘅生命。」對佢嚟講，訓練、比賽同工作，完全融入佢嘅生活當中。

回到最初，當年因為表弟學跆拳道，佢先第一次接觸呢項運動。後來自己落場學，純粹覺得「好型」，再加上想自己有一技傍身，遇到危險嘅時候可以保護自己。嗰陣時嘅動機好簡單，亦冇諗過有一日會着上港隊戰衣，站上國際舞台。第一次比賽，只係抱住「志在參與」嘅心態，但一到真正上場，又自然唔想輸。於是比賽前練多啲、再練多啲，當攞到獎項嗰一刻，成功感同滿足感慢慢累積起嚟。

講到最難忘嘅一場比賽，江麗莉毫不猶豫提起2024年印尼公開賽。嗰次身體狀態極度不佳——天氣酷熱、水土不服、比賽前不停肚瀉，加上舊患復發，個人情緒跌到谷底，甚至覺得自己一定攞唔到冠軍。但佢形容自己性格偏樂天，負能量嚟得快、走得都快。冷靜落嚟之後，佢反而同自己講：「就算身體情況不佳，我都仍然有能力攞到呢個冠軍。」呢份對自己嘅信任，成為佢撐落去嘅關鍵。結果喺出賽前食止痛藥、頂住身體不適嘅情況下，成功奪冠。返到香港之後，足足休息咗一個星期先回復。

成為專業運動員，最難嘅唔一定係體能或技術，而係「放棄」嘅覺悟。江麗莉坦言，你要放棄玩樂時間、放棄充足休息、放棄冇節制嘅飲食，甚至放棄一部分收入，先可以真正推動自己追求更好成績。

有一次，佢獲選代表港隊出外比賽，同一時間卻收到一份高薪私人任教兩星期邀請。金錢同比賽二揀一，佢最後選擇咗披上港隊戰衣。幸好付出無白費，成功為港爭光，亦令佢更加肯定自己嘅選擇。

展望未來，江麗莉嘅目標好清晰——世界第一。佢知道呢條路好難，但以前覺得遙不可及嘅「夢想」，而家已經變成一個實實在在嘅「目標」。佢會繼續努力，繼續向前。

由一份純粹嘅喜愛開始，到踢出屬於自己嘅世界舞台，江麗莉一步一步踢出信念、踢出堅持。

相關文章：何甄陶：Make sure you are doing it for yourself.

相關文章：羅浩天：「堅持自己鍾意嘅嘢，先無悔無憾。」

相關文章：何思朗：「有夢就要追！」