何思朗：「有夢就要追！」

對好多觀眾嚟講，劍擊優雅又瀟灑，但對今屆十五運會男子佩劍個人銀牌得主何思朗嚟講，劍擊背後係戰術同身體反應一齊爆發嘅運動，需要瞬間判斷同身體反應完美配合，係一項鬥志鬥力嘅運動。他形容自己愛上劍擊並唔係刻意選擇，而係一種好自然嘅安排，一步一步練、一步一步打，最後就行咗上全職運動員嘅路，一直堅持到今日。

（圖片來源：受訪者提供）

回望生涯最值得驕傲嘅時刻，世界錦標賽肯定係其中之一。嗰次一路過關斬將，面對嘅全部都係世界排名頭16嘅頂尖對手。最震撼嘅一幕發生喺32強，佢當時落後14比9，基本上好多劍手都會放棄，但佢最終成功反勝！ 思朗坦言：「嗰種喜悅真係好難忘，感覺自己終於得咗啦，我係有能力係世界佔一席位。」

（圖片來源：受訪者提供）

講到今屆全運會，佢覺得呢面個人獎牌係對自己多年努力嘅肯定。第一場小組賽佢一度落後緊4比1：「全場觀眾嘅打氣聲，叫返醒我，最後反勝返5比4，之後先越打越有信心，好多謝各位現場嘅支持者。」

成為全職運動員從來唔容易。佢坦言過去兩年係低潮期，成績唔太理想，不斷試新方法但屢試屢敗，甚至懷疑自己。佢認為突破樽頸位係最難嘅一關，往往會覺得自己跌入無限輪迴，但佢始終相信，只要堅持、總有一個方法適合自己。

講到未來，何思朗嘅方向非常清晰——短期目標係亞運會，長期則以奧運為終極舞台。

（圖片來源：受訪者提供）

對於新一代劍手，佢分享咗一句好深刻嘅話：「書幾時都有得讀，但做運動員錯過咗就無。有夢就要追，但都要尊重屋企人，有孝先會順。」佢話每個人都想做世界冠軍，但關鍵係：「你有無本事做到？Why not me？」

何思朗嘅故事，係由興趣變熱愛，再由熱愛變力量嘅旅程。專注一擊，堅持一念，他用劍擊走出屬於自己嘅世界舞台。