【球場內外的磨練】

香港壁球運動員黃祉謙，一直喺球場上用堅毅、汗水同信念，打出屬於自己嘅故事。對佢嚟講，壁球唔只係一項運動，更加係佢成長嘅縮影：「壁球填滿咗我經歷嘅每一頁，無論朋友、目標、成長，都彷彿與壁球有關。」

中學時期，黃祉謙發現自己對壁球訓練特別專注，亦開始比起其他嘢更認真。呢份專注，慢慢將佢推向職業運動員嘅道路，從此人生同壁球緊緊扣連。

「喺杭州亞運，首次增設混雙項目，我同拍檔嘉兒奪得銅牌，呢一刻真係最深刻。」比賽背後，其實經歷咗比想像中更多嘅波折，但正正因為咁，呢面銅牌對佢嚟講更加有重量。

專業運動員嘅路從來唔容易，有時候最難接受嘅唔係體能訓練，而係心理關口：「好多時練習感覺良好但出去外地比賽成績會有落差，失敗果一刻會感到非常挫敗。」近年，佢開始見心理治療師，學識專注自己嘅表現多於輸贏，接受比賽只有一個贏家：「有時只係當日對手發揮得更好。」

「香港冠軍同亞運金牌」，係佢近年最想達成嘅兩個大目標。無論喺本地定國際舞台，佢都希望能夠再突破自己，攞到屬於香港同自己嘅榮耀。

「年輕時我經常被稱天份不足同只會靠體能打壁球，但只要訂立到確實目標同努力不懈去追夢。只要你夠投入去打壁球，一定會有改變。」呢份堅持，正正就係佢一路走落去嘅最大動力。

由專注、挫敗到突破，黃祉謙嘅壁球人生，係一段用汗水同信念寫成嘅故事。支持香港運動員，一齊見證佢哋嘅下一頁

相關文章：梁子軒：「壁球是我人生啟蒙老師。」
相關文章：何家晞：「壁球是我自信，亦是我與家人情感的橋樑。」
相關文章：何子樂：「儘管曾經跌倒，但每次都能重新站起。」
相關文章：鄧銘漮：「壁球代表我嘅人生。」
相關文章：劉子均：壁球是我的人生導師。