由街場到啟業活化：香港街籃精神與城市創意
喺香港嘅街頭巷尾，籃球場永遠係最有生命力嘅角落。唔單止係年輕人揮灑汗水嘅地方，更承載住友情、成長同社區回憶。
葉嘉華（Jason Yip），一位由街場走入傳媒、再投身運動場設計及體育管理嘅傳奇人物，生於80年代，親身見證香港街籃文化由熱潮到活化嘅轉變。佢嘅故事唔止係個人奮鬥歷程，更係香港街頭籃球文化嘅縮影，當中充滿堅持、創新，同對社區嘅深厚熱愛。
街場與生活（圖片來源：受訪者提供）街場與生活
問：對你嚟講，街場除咗打波之外，仲承載住啲咩生活回憶？
答：
對我嚟講，街場從來唔只係打籃球嘅地方。生於80年代，成長時期資訊未算發達，社區內嘅公共空間就係我嘅社交平台，而因為鍾意籃球，街場自然成為我最常流連嘅地方。 受到90年代NBA熱潮影響，當年有唔少年青人打籃球，而我人生最好嘅朋友，亦正正喺街場認識。最初大家係「敵人」，打波時互有輸贏，慢慢喺切磋之中建立默契，由對手變成朋友，直到今日依然無分彼此，好似一家人。
街籃的「跟隊制度」（圖片來源：受訪者提供）問：街籃嘅「跟隊制度」對你嚟講有咩影響？你覺得佢塑造咗你啲咩性格同特質？
答：
街場嘅「跟隊制度」對我影響深遠。成長於公共屋村，面對嘅問題就係兩、三個籃球場有時候不足以應付所有居民嘅使用量。要知道八、九十年代無智能電話、無網絡世界，電視遊戲機都屬於奢侈品，好多時候打波就係主要娛樂，一輸波隨時要等好耐先有得再落場。 正正因為咁，我由細就養成一種唔服輸嘅態度，不斷反覆練習、提升自己——唔係唔輸得，而係唔可以輸。呢種心態一路影響住我嘅成長，亦帶到而家嘅體育管理工作入面，凡事盡力處理，不畏懼、不退縮。
職業生涯啟發（圖片來源：受訪者提供）職業生涯啟發
問：你由街場打波開始，之後做體育媒體，又參與運動場設計同體育管理，回望返，你覺得街籃對你事業最大嘅影響係咩？
答：
我一直都唔介意分享自己嘅故事，希望可以啟發更多人。初中時爸爸因病過身，家姐亦到外國讀書，為咗減輕屋企負擔，我開始搵兼職。由於一向好鍾意NBA，我寫信自薦到當時全港唯一嘅NBA雜誌應徵，經過考核後成功獲聘，正式展開我嘅傳媒人之路。 回顧返，其實呢段經歷相當特別。求學時期其他同學多數做補習、售貨或餐飲工作，而我就寫文章、分析賽事、訪問NBA球星。當初能夠把握到機會，正正源於不畏懼、不退縮嘅態度，而呢份心態，其實早已喺街場打波時不知不覺培養出嚟。 隨住紙媒式微，我轉型繼續喺網絡媒體發展，透過籃球走訪不同地方，亦認識到世界各地嘅朋友。大約喺2013年，我開始建立自己嘅平台，記錄不同地方嘅街場文化，當中亦包括香港。 由介紹街場同社區開始，慢慢衍生出唔同項目，亦令更多人重新留意自己身邊嘅人同事。其後誕生咗《捍衛主場》同《啟業運動場》等大家熟悉攞咗國際性獎項嘅項目。直到而家，我依然為自己能夠參與、甚至推動香港運動產業發展而感到榮幸同驕傲。
啟業運動場活化計劃（圖片來源：受訪者提供）啟業運動場活化計劃
問：啟業運動場活化計劃嘅設計靈感係嚟自邊度？你最想保留或者特別強調啲咩元素？
答：
作為香港首個注入設計元素嘅運動場，我同拍檔喺創新之餘，刻意保留啟業運動場原有特色，例如黃色外框同天窗，讓新舊融合，呈現香港精神。 設計靈感來自我哋走訪世界各地街場嘅經驗，透過不同高度嘅籃球框同具象徵性嘅裝置，表達運動場可以由市民自由定義，成為適合一家大細、屬於所有人嘅共融空間，同時亦係社區嘅聚腳點。
新啟業運動場感受或體驗（圖片來源：受訪者提供）問：你希望新啟業運動場想帶畀用家一個點樣嘅打波體驗？
答：
我希望所有使用者都玩得開心，美觀、實用同靈魂缺一不可。運動場啟用至今反應熱烈，無論打波定打卡，使用者都感受到我哋嘅用心。 啟業運動場嘅經驗，令更多人開始關注運動場設計。不過我始終相信，設計唔應該過於花巧，亦希望未來不同單位喺規劃場地時，可以多從用家角度出發，喺設計同實用之間取得平衡，令場地更方便、更貼近市民需要。
街籃文化與城市體育議題
問：你覺得香港嘅街籃文化，同我哋嘅城市生活方式有啲咩關聯？
答：
香港街頭籃球文化同城市生活方式息息相關，地小人多，球場數量有限，唔少街場尺寸比例唔夠理想，例如三分線同邊線距離不足。 如果空間有限，其實可以考慮唔劃線或簡化設計，因為街場主要係休閒用途。其他地方如中國、美國、日本，好多街場都冇三分線，甚至只有邊線，簡潔、美觀同實用兼備。 另外，香港街場節奏較快，多數係速戰速決，亦反映咗城市生活嘅快節奏。
問：如果有機會重新規劃香港嘅公共運動場，你最想改變啲咩，或者有邊啲特色一定要保留？
答：
自從啟業運動場出現之後，特色運動場越來越多。我希望未來翻新或活化運動場時，可以注重新舊融合，融入香港特色元素。香港本身好特別，唔需要拆晒所有嘢先係好，保育、善用空間同增添藝術感都好重要。
街頭籃球精神（圖片來源：受訪者提供）
