【羽毛球｜事業上的好夥伴】

對於香港羽毛球代表伍家朗嚟講，羽毛球唔單止係一項運動，更加係佢事業上最重要嘅夥伴。由細到大，佢都熱愛羽毛球，而真正令佢成為專業運動員，係因為羽毛球帶畀佢無可取代嘅滿足感：「當我喺比賽中贏到自己認為好強、好難打嘅對手，嗰種滿足感真係無可比擬，令我更有信心、更有動力去繼續挑戰自己。」

每位運動員都有屬於自己嘅高光時刻，伍家朗最驕傲嘅，莫過於喺國際賽場上攞獎同擊敗強勁對手。呢啲成就唔單止證明咗佢嘅實力，仲成為佢繼續努力嘅動力：「當你贏到一場自己認為好艱難嘅比賽，會覺得自己所付出嘅努力值得，亦會令自己更想突破更多界限。」

作為頂尖運動員，訓練當然唔簡單，特別係當面對未知：「好多時未必肯定自己練嘅嘢係咪真係對比賽有幫助，或者方向啱唔啱，呢種迷惘都係最大挑戰之一。」但經驗話畀佢知，解決方法就係通過不斷比賽、總結經驗，然後再改良訓練方法，確保自己向住正確方向進步。

近年香港體育發展有進步，資源亦有所增加，但伍家朗認為，運動員嘅訓練可以更科學化，令表現更有效率。此外，推廣羽毛球最重要嘅，係喺社區層面做更多：「可以喺學校搞多啲羽毛球活動，或者增加民間比賽，令大眾有更多機會參與，從而提升整體羽毛球水平。」

「未來仍然會繼續做運動員，未有退役計劃。」伍家朗亦有鼓勵年輕球員：「如果真係有羽毛球夢，就要早啲認清自己嘅目標，仲要以專業運動員嘅心態去面對訓練，因為越早打好基礎，成功機會就越大。」

伍家朗用實力同拼搏精神，寫下屬於自己嘅羽壇傳奇。期待佢繼續為香港羽毛球壇創造輝煌！