羅浩天：「堅持自己鍾意嘅嘢，先無悔無憾。」

對於香港劍擊運動員 羅浩天嚟講，劍擊絕對唔只係一項運動。由小學畀同學拉住一齊上興趣班開始，原本只係玩玩下，點知越玩越入迷。「劍擊暫時佔咗我人生大部份時間，亦都係最重要嗰部分。」呢份喜歡，陪住佢由細練到大，變成咗今日嘅熱血、目標同信念🔥

（圖片來源：受訪者提供）

羅浩天提到：「喺過去嘅比賽，試過打到個腦同個身體都好攰好攰、崩崩地，但我知有好多人喺度撐緊我，我唔可以就咁跌低。」就係呢份信念，支持住佢由谷底爬返上去，最後仲成功攞到勝利。對佢嚟講，每一次突破自己，都係因為身邊有人無條件支持。

劍擊運動節奏快、專注度高，長年累月嘅訓練講求嘅唔止係體能，仲有心態。「最難都係個人好攰嘅時候，點樣頂住，點樣克服。」佢講得直接：「一定會有起有跌，要學識接受，學識調節，唔好畀自己困喺低谷。」呢份抗壓能力，係佢依家最珍貴嘅收穫之一。

（圖片來源：受訪者提供）

羅浩天：「短期目標係全運會，希望可以好好享受。」唔係話一定要贏，而係希望喺賽場上做到最好嘅自己，無悔發揮。我哋都睇到羅浩天全運會喺賽場上表現得非常精彩，每一分都打得好落力，無論順境定逆境，都全情投入、毫不保留。

（圖片來源：受訪者提供）

「好好堅持自己鍾意嘅嘢，搵到自己嘅目標，相信自己，做好自己。」佢話，目標未必一定達到，但只要你努力過，就算最後結果點，都可以同自己講一句：「起碼我無悔無憾。」