由一個覺得訓練辛苦嘅男孩，到今日穩守世界跆拳道品勢排名第五位嘅中國香港代表——陳頌賢。佢用時間同堅持，慢慢將抗拒變成熱愛。呢個排名唔係一蹴而就，而係由無數次跌低、懷疑自己、再一次企起身嘅時刻堆疊而成。對陳頌賢嚟講，跆拳道從來唔只係一項運動，而係佢做人做事嘅一種態度。

自從成為港隊運動員之後，佢每日嘅生活都同「品勢」扣連在一起。就算係休息日，佢都會反覆鑽研每一個動作、每一個細節，思考點樣可以再做好啲。呢份對細節嘅執着，正正反映佢待人處事嘅認真——因為只有認真對待，先可以真正做好每一件事。

不過，呢份投入並非一開始就存在。陳頌賢坦言，以前都曾經抗拒過跆拳道。日復日咁重複同一套動作，訓練辛苦又沉悶，令佢一度懷疑自己可唔可以堅持。但隨住訓練慢慢成為生活一部分，佢慢慢沉醉喺揮灑汗水嘅過程中，加上對動作極致嘅追求，心態亦由「覺得沉悶」轉變成「渴求進步」，慢慢學識享受每一次練習。

講到最難忘嘅時刻，佢一定會提起2024年香港舉行嘅世界跆拳道品勢錦標賽。主場出戰，好多親戚朋友特登到場爲佢打氣：「我記得我哋男子團體贏得銅牌嘅時候，好多觀眾都爲我哋歡呼，令我十分感觸。」即使之後不敵美國隊止步季軍，但觀眾嘅掌聲同支持，成為佢心入面最驕傲、最感動嘅畫面。

喺品勢訓練入面，最難捱嘅從來都唔只係體能，而係意志力。日以繼夜反覆打磨同一個動作，追求每一分到位嘅極致。陳頌賢：「體能訓練上嘅艱辛、反覆練習同一個動作所需要嘅專注力、面對樽頸位停滯不前嘅煩惱，以至比賽落敗時嘅挫敗感，全部都要靠意志力支撐住自己，推動自己繼續向前，堅持落去。」

展望未來，陳頌賢已經將目標放喺2026年亞洲錦標賽、世界錦標賽同亞洲運動會。賽期未定，但準備永遠唔可以停。佢選擇專注當下，每一課訓練都唔鬆懈，希望到時可以攞到好成績！

作為前輩兼現役運動員，佢寄語一班年輕運動員：「你哋經歷緊嘅過程我都經歷過，而我亦都無放棄過一直前進，希望你地都可以堅持落去唔好放棄，總有一日都可以取得好好嘅成就！」只要唔放棄、繼續向前，總有一日，努力會帶你去到屬於自己嘅舞台。

汗水、挫敗、堅持——陳頌賢一步一步踢出屬於自己嘅位置。記住只要肯努力，夢想就唔會遙遠！

相關文章：一腳一念．踢出信念｜江麗莉：由「型」開始，踢到世界第一

相關文章：何甄陶：Make sure you are doing it for yourself.

相關文章：羅浩天：「堅持自己鍾意嘅嘢，先無悔無憾。」

相關文章：何思朗：「有夢就要追！」