逆境而上．愈戰愈強｜陳梓朗：我嘅正職係打手球，兼職係做教練。

發布日期: 2026-04-03

「我嘅正職係打手球，兼職係做教練。」對香港手球代表陳梓朗嚟講，呢句說話唔係講笑，而係一種身份認同。手球對佢而言，從來唔只係興趣同專業咁簡單，如同武士道、柔道等，手球相等於梓朗嘅「道」，需要長時間修行、磨練意志同信念，亦已成為佢生活嘅核心。

最初接觸手球，其實係一次誤打誤撞。小六嗰年，學校籃球隊贏咗區內冠軍，老師順便報埋學界手球比賽，練咗唔夠兩星期就落場。因為佢唔驚波，被安排打龍門，連球例都未熟就出賽，竟然一路闖入八強。升中後，教練叫佢轉打輔位同翼位，由守轉攻，第一次感受到全力起跳射門嘅快感——嗰種喺半空爆發力量、將球狠狠轟入龍門嘅瞬間，令佢真正愛上手球。到高中，佢決定將手球定為主項。後來代表港隊出戰國際賽事，見識亞洲頂級水平，發現自己與職業球壇之間嘅距離其實並非遙不可及，於是立志以成為職業球員為目標，一直努力至今。

（圖片來源：受訪者提供）

講到最深刻嘅時刻，佢一定揀今屆全運會。以往港隊出戰大型賽事多數作客海外，從未試過有主場觀眾支持。今次喺香港迎戰職業勁旅，置身激烈競爭之中作戰。對手一星期練五日、一日兩課，無論訓練量、資源配套，抑或球員身型都遠勝港隊。但佢哋無退縮，用自己嘅方法迎戰強敵，歷史性打入四強，向所有香港人證明香港手球有能力挑戰職業水平。

四強對安徽隊一戰，展現出佢頂級水準的其中一場比賽。球隊部署先派力量型主攻連潤滔消耗對手，等對方適應節奏後，再由速度型嘅佢上場改變戰況。佢喺場邊細心觀察對手習慣及分析球場情況，一落場即刻針對弱點，幫球隊追回比數，防守上亦成功製造失誤同抄截。雖然最後惜敗無緣決賽，但佢直言呢場係自己發揮得最好嘅一場，而佢亦係整個賽事抄截數最多嘅球員。

被看見的光芒之中，夾雜著資源匱乏的現實。十九歲第一次入選成年隊時，港隊甚至無恆常訓練，一個月未必借到一次室內場，更無健身室同物理治療支援。即使後來資源有所改善，仍然難以與職業球隊相比。無職業配套，佢就自己創造條件——自費聘請肌力與體能訓練（S&C）教練，安排科學化體能訓練。亦喺坊間尋找配備力量平台（Force plate）、速度感應器（VBT Sensor）、飛輪（Flywheel Equipment）等高價訓練器材嘅健身室，只為喺體能上貼近職業水平；訓練以外，兼任教練維持收入，同時確保唔影響備戰，用自己方法喺香港做到接近職業嘅要求。

展望未來，團隊目標係今年九月名古屋亞運會衝擊前八，年尾中國超級聯賽香港分站再挑戰頭三名，希望喺主場再創歷史佳績。至於個人目標，始終如一以旅外成為職業球員為目標，爭取於外地職業球隊落班嘅機會，成為香港第一個挑戰外國職業聯賽嘅手球運動員。