【羽毛球夢．衝擊世界】

香港本地羽毛球員吳英倫，由細到大，羽毛球一直都係佢生命中嘅一部分。因為屋企人鍾意打波，佢好自然就接觸咗羽毛球，慢慢發現呢項運動唔止係興趣，而係佢最熱血嘅舞台：「羽毛球比拼嘅唔止係速度同力量，仲有智慧、心理、技術同耐力，成件事都好正、好刺激。我好想挑戰自己，衝擊世界冠軍呢個位置，證明自己一定做到。」

講到印象最深刻嘅比賽，吳英倫第一時間就提到上年嘅香港公開賽打入八強同澳門公開賽奪得銅牌。「每一場比賽都係檢視實力嘅機會，由青少年賽到成人賽，我每一年都有進步。上年嘅成績唔單止肯定咗我嘅努力，仲畀咗我更大動力去向上衝擊世界排名。」

專業運動員嘅路，從來都唔輕鬆。吳英倫直言，最艱難嘅係遇到樽頸位停滯不前：「你會覺得好沮喪，因為不停嘗試又不停失敗，有時仲練到發脾氣，甚至唔想再打波。但我會不斷提醒自己，相信自己做緊嘅嘢，繼續堅持。因為我知道，只要唔放棄，距離突破同成功嘅『答案』就會越嚟越近。」

下一步，吳英倫希望可以成功入圍世界錦標賽同亞運會個人項目資格。但佢最終嘅大夢想好清晰——奧運金牌！「打奧運、攞金牌返嚟，係我心入面最想實現嘅目標。」

對於滿懷羽毛球夢嘅年輕球員，吳英倫勉勵大家千祈唔好懷疑自己：「我哋中國香港運動員已經有同世界一較高下嘅實力，甚至有機會贏到對手。最緊要係相信自己，繼續堅持落去。」