由最初因為閱讀日本運動漫畫《排球少年》而對排球產生興趣，到今日成為香港排球代表隊嘅主力之一，江卓軒用咗好多年時間，打出屬於自己嘅位置。呢個位置，唔只係球場上嘅角色定位，而係無數次訓練流汗、比賽拼搏、取捨同堅持慢慢累積而成嘅成果。正如佢所講：「排球對我嚟講係一項可以釋放自己嘅運動，每次挑戰高水平嘅對手都覺得好熱血、好滿足。」對江卓軒嚟講，排球早已唔只係一項運動，而係推動佢不斷向前、突破自我嘅一部分。

講到過往比賽當中印象最深刻嘅一刻，雖然有好多大型比賽如亞運會同全運會都令佢難忘，但如果要揀一場，佢會講2024年香港甲一聯賽四強。嗰年係佢第一年打甲一聯賽，球隊由降班危機到殺入四強，個過程已經好滿足。當日對手狀態火熱，佢哋作為新秀去挑戰，拉鋸咗五局惜敗，而佢自己交出咗31分嘅個人得分。即使輸，但係佢哋嘅表現絕對值得驕傲。呢場波唔只係比賽，更係同班兄弟一齊拼搏嘅回憶。

今次參加全運會，對江卓軒個人同運動生涯嚟講，代表住一個好珍貴嘅鍛鍊機會。因為對手基本上都係職業隊，訓練時數、配套同資源都遠超港隊。所以每場比賽都係硬仗，但佢哋憑住鬥志同技術，不斷挑戰對手，甚至最後贏咗3隊職業隊，創造咗香港隊嘅歷史佳績。呢個結果證明咗香港隊嘅水平，證明咗即使資源有限，都係有好多可能性。提醒住佢要不斷進步不斷向前行。全運會男排項目雖然唔係香港舉辦，但現場出乎意料地有好多支持香港隊嘅球迷，不斷為佢哋打氣。感受到佢哋對排球同香港隊嘅支持，令佢覺得原來都有好多人期待住佢哋嘅表現，都係一種動力去發揮得更好。

成為運動員，一路都唔容易。喺排球訓練入面，卓軒覺得最艱難嘅挑戰係時間分配。佢自己本身讀緊書，備賽期一個禮拜7日都要練波，仲有4日肌力與體能訓練（S&C），再要翻學嘅時候，真係唔夠用。要喺咁密集嘅行程底下確保充足休息，好艱難。一年前，佢就因為無好好分配時間，休息唔夠，好不幸咁受傷要休息半年。之後佢就好重視點樣去平衡訓練同作息，確保自己每日都可以用最好嘅狀態去應付所有挑戰。

談到未來目標，江卓軒毫不猶豫咁講：「我暫時嘅目標就係大專聯賽同甲一聯賽嘅冠軍，因為呢兩個比賽，我都未贏過。」講到呢度，佢語氣變得更加堅定，直言：「而我都唔再係以前嘅細路，我好想用自己努力鍛鍊返嚟嘅實力，幫助球隊征服呢兩個比賽。」江卓軒亦為自己定下要求，希望喺進攻同防守兩方面都交出對得住自己、亦對得住隊友嘅表現，同球隊一齊，寫下屬於佢哋嘅新一頁。

對於追夢嘅新一代年輕球員，江卓軒想同佢哋講：喺香港打排球想登頂唔容易，但唔係無可能。只要有鬥志有鬥心，再多嘅困難都唔會阻到你。就係要困難，先有要完成嘅意義。不甘平凡，唔好接受自己嘅平庸，努力去挑戰自己，你嘅極限永遠比你想像中更加遠。

由一份純粹嘅喜愛開始，到扣出屬於自己嘅全運會佳績，江卓軒一步一步扣出信念、扣出堅持。