由一個單純鍾意打波嘅年輕人，到今日喺球場上拼搏嘅排球運動員——譚竣顥，用心打出屬於自己嘅成長軌跡。對佢嚟講，排球從來唔只係比賽，而係融入生活，甚至成為生命中不可或缺嘅一部分，亦係支撐佢走過高低起伏嘅精神寄託。「排球對我嚟講，唔單止係一項運動，更加係我嘅生活、生命同精神寄託。」真正令佢愛上排球嘅，唔係單純嘅勝利時刻，而係每一次面對挫折、受傷，甚至想放棄嘅時候，學識點樣調整心態、重新出發。呢種由低谷一步一步爬上嚟嘅成功感，先至係最難得。

排球係一項六人團隊運動，無需同對方有任何肢體碰撞，但極度講求默契同信任。「唔可以靠一個人贏波」，每一分都係全隊努力嘅成果。正因為咁，排球對竣顥嚟講，已經唔再只係單純嘅運動，而係教識佢成長、團結同堅持嘅人生導師。

講到最難忘嘅一場比賽，佢提到2025年全運會對戰天津隊。面對職業球隊，雖然賽前準備充足，但佢開局表現未如理想，一度被換離場，心態亦受到影響。不過佢離開場之後重新調整心態，最終喺後段重新上場發揮，幫助球隊以3:2反勝對手。「呢場波真係靠心理質素同全隊人一齊努力，先可以換來一場咁艱辛嘅勝仗。」加上現場有大量香港觀眾支持，可以喺主場館獲得一場勝利，係非常之難得。

2025年全運會對佢嚟講意義重大，可能係一生人唯一一次參與。雖然佢坦言自己整體表現未算理想，但喺隊友支持同教練信任之下，一路調整狀態，喺最後一場總算交出一個比較滿意嘅表現。經歷九場高強度比賽，香港隊最終取得四勝五負、全國第十名。面對有完善職業配套嘅強隊，作為業餘隊伍能夠交出呢個成績，對佢哋嚟講絕對係肯定同里程碑。

不過光鮮背後，其實係全年無休嘅付出。由本地聯賽到排總盃，再到代表隊賽事，香港排球幾乎無休賽期。最困難嘅唔只係體能，而係點樣長時間維持高水平狀態。「狀態一定有高低，點樣調整心態先最關鍵。」再加上佢已經投身職場，平日要返工，週末打聯賽，同時每星期仲要進行三至四日體能訓練，時間同體力都被壓榨到極致，甚至連休息時間都要犧牲，全靠對排球嘅熱誠同愛支撐。

展望未來，竣顥目標清晰。短期希望喺香港甲一組排球聯賽2026奪得冠軍，努力多年後仍希望拎到嘅殊榮；長遠則希望有機會衝出香港，挑戰海外職業聯賽。「儘管呢件事好難完成，而且要犧牲嘅都好大，但都希望可以喺自己仲有力氣同青春嘅時候闖一闖。」

最後，佢送上一句說話俾所有追夢嘅年輕人：「You will never know your limits until you push yourself to it.」唔好等見到結果先努力，而係一直堅持，先會見到成果。由低谷到反彈，由迷失到堅定——譚竣顥用行動證明，真正嘅強大，係喺逆境之中，依然選擇繼續向前。記住球一日未落地，一切未完！

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意