【武術之路．無懼挑戰】

今屆世運會勇奪女子長拳劍術槍術全能金牌，並擔任開幕禮持旗手嘅香港武術運動員——沈曉榆一直以武術挑戰自己極限，每一次跳躍、每一套動作都係青春嘅印記。對佢嚟講，武術唔只係運動，更係生活嘅一部分：「武術對我嘅存在就係無佢無我，所有喜與悲都係佢帶俾我。」正因為鍾意挑戰同動作型格，佢決定走上專業道路，睇吓自己可以去到幾盡。

沈曉榆話最令佢印象深刻嘅係近期2025年第12屆世界運動會：「第一次喺咁多觀眾面前比賽，規模都好大，感受到滿滿支持，好佩服自己可以承受全能項目嘅心理壓力，仲能享受成個比賽過程。」呢種經歷令佢更加堅定自己對武術嘅熱愛。

成為專業武術運動員唔易，最大挑戰係點樣避免傷患。「每日練嘅跳躍動作落地都可能整親或者勞損，一整親嘅話好多嘢都做唔到，所以一定要避免傷患。」而且要將動作演繹到極致，配合個人風格，同時做到收放自如，都係多年累積嘅功夫。沈曉榆坦言：「唔係對打運動，要靠自己聯想動作嘅攻防意識，再用自己風格去演繹，真係唔容易。」

短期目標係今年世界錦標賽爭取金牌，遠少少就係2026年亞洲運動會全能項目獎牌。對佢嚟講，亞運會獎牌係由細個已經夢想突破嘅目標。

沈曉榆勉勵年輕武術運動員：「唔好因為幾次失誤就放棄武術，你哋一定會喺過程中收穫好多，變得更加強大！」

每一次武術揮動，背後都係汗水、毅力同青春嘅痕跡。