【武術人生．太極之道】
練武之路，從來唔易。日日重複同一套動作、面對無數次失敗，學識「苦中作樂」，亦體會到堅持同沉着帶嚟嘅力量。今屆世運會勇奪香港武術太極拳太極劍全能項目金牌——香港武術運動員 楊頌熹：「武術唔只係一項運動，更加係佢人生嘅導師。」

「武術教識我點樣控制心態，點樣喺失敗入面企翻起身。」細個嗰陣，爸爸成日睇李小龍，見到螢幕上啲動作又型又有氣勢，頌熹都會喺屋企跟住扮打。慢慢地，屋企人見佢真係有興趣，就安排佢跟李珍珍師傅學武術，開展咗一條由熱愛變成堅持嘅路。

問到印象最深刻嘅比賽：「每一個比賽對我都係最印象深刻。」由初出茅廬到代表香港出戰，無一場比賽係白費功夫。正因為有一場又一場嘅經驗，先令佢有能力挑戰更高層次嘅舞台。「每一次比賽都造就緊而家嘅我，我對每一個我人生中嘅比賽都會話係最感恩。」

楊頌熹形容訓練係「苦悶」，但佢反而學識咗點樣享受。「武術無捷徑，停三日唔練，就要用成個星期搵翻個感覺。既然開心唔開心都要練，倒不如享受吓嗰種嘅苦悶。」 正正係呢份苦中作樂嘅態度，令佢喺長年累月嘅基本功訓練中，搵到屬於自己嘅節奏同力量。

「我嘅夢想係可以代表香港出戰亞運會！」。佢更希望能夠令觀眾、評判同其他國家隊嘅教練欣賞自己嘅太極演出：「只要佢哋認同我嘅表現，我就覺得好值得！」

「既然你哋揀咗武術，就唔好畀自己後悔。」楊頌熹話，呢條路一定唔會一帆風順，但正正因為有困難，先可以磨練心態。「當你學識面對苦，將來無論做咩工、遇到咩大風浪，都唔會咁易崩潰。」佢仲鼓勵後輩：「唔好怕醜，主動問多啲前輩同隊友，咁你進步就一定更快！」

從童年模仿李小龍嘅小朋友，到今日以太極代表香港出賽，楊頌熹用實際行動詮釋咗「武」字真正嘅意義。