【為港足第100次上陣】

34歲嘅葉鴻輝（阿輝）自09年首次為港足把關，代表港足近15載，更喺早前東亞盃外圍賽迎戰蒙古隊達成第100次上陣國際賽嘅里程碑，為香港足球創下歷史。足球於佢嘅意義，非比尋常：「去到呢一刻我人生有一半嘅時間都係一名足球員，足球已經係我生活中一個不可分離嘅部分。」

一直以嚟經歷過大大小小嘅比賽，呢位門神一直保持住對勝利嘅執著，同埋對足球嘅堅持不懈，一切都源自於佢對足球呢項運動嘅熱愛：「如果唔鍾意依一個運動，絕對唔可以喺依個項目入面維持咁耐。」

回顧15年港足生涯，對阿輝嚟講，難忘時刻比比皆是：「包括2009年東亞運奪金、第一次代表港隊踢A級賽(2010年對日本)、同埋今年年頭參加卡塔爾亞洲盃決賽週，全部都係好深刻同難忘嘅賽事，每一場都令我更加成長。」

近年香港足球界有唔少新人抬頭，佢亦寄語年輕球員要好好為自己訂立一個實際嘅目標：「訂立目標之餘，亦需要每時每刻都保持力求進步嘅心態，遇到挫折唔好太易放棄。」每一步都係新嘅起點，期待阿輝繼續keep住狀態，為香港隊貢獻更多力量！