【熱愛與堅持】

香港本地籃球員吳委峻，無論場內場外，都以堅定嘅信念迎接每一個挑戰。佢深信，籃球唔單止係一場比賽，更係一種自我證明：「籃球可以證明我自己，打破其他人對我嘅質疑。」面對質疑同挑戰，佢選擇用行動回應，以熱愛同堅持走出屬於自己嘅籃球路。

2023年，吳委峻代表中國香港踏上東亞運動會嘅舞台，對戰各地強隊。「代表港隊出賽一直係我嘅夢想，可以累積比賽經驗，見識唔同打法，令我更加努力去追趕其他球員。」佢坦言，希望未來能夠挑戰更高層次嘅對手，希望有一日可以打贏國家隊、中華台北隊！」

籃球路上面對無數挑戰——生活壓力、傷患風險，甚至要放棄許多東西，但佢深信：「克服困難，會成就更堅強更好嘅自己。」每一次嘅掙扎同堅持，都係對熱愛嘅證明：「要真係熱愛呢個運動，先可以令自己堅持落去。」

面對外界嘅質疑同唔信任，無論係網上、朋友，甚至屋企人，都有人質疑佢嘅選擇，叫佢放棄打波專注讀書。但我係一個倔強嘅人，越多人覺得我唔得，我就越要證明俾佢哋睇！佢選擇用行動去證明：「我會用表現打破佢哋嘅質疑。」而背後默默支持佢嘅家人、朋友同球迷，更令佢唔想辜負大家對佢嘅期望，堅持向前。

「如果你哋真係鍾意籃球，唔好輕易放棄，要認真對待。」吳委峻鼓勵年輕球員，不論遇到多少困難，堅持係唯一嘅出路：「目標要放得遠大，唔好怕人笑，堅持落去，你哋一定得！」

期待委峻未來在球場上繼續突破自己，為香港籃球寫下更精彩的篇章！