對馬拉松運動員呂偉強嚟講，跑步從來唔只係「跑」。佢形容馬拉松係一場全方位嘅自我挑戰，唔單止考驗體能，更加係心理、心態，甚至意志力嘅較量。「你永遠唔會知道結果，直到衝過終點嗰一刻。」正正係呢種未知，令馬拉松變得吸引。由長時間訓練，到比賽當日嘅發揮，每一步都充滿變數。就算準備得再充足，都冇人可以預測最終成績，呢種不確定性，反而成為推動佢不斷向前嘅動力。

講到最難忘嘅時刻，佢第一時間諗起2017年香港馬拉松，第一次成功以「sub3」（3小時內完成）嘅時間完成全程42.195公里。為咗呢個目標，佢喺賽前幾個月經歷咗高強度訓練，但因為係第一次挑戰，心入面其實冇太大把握。比賽當日，佢只係專注跟住目標配速一路跑，好似平時訓練咁，一步一步堅持落去。加上有一班師兄陪住，令佢心情放鬆唔少。直到最後衝線一刻，佢都未敢肯定自己做唔做到。當跨過終點、見到熟悉面孔，知道自己成功達標嗰刻，嗰種喜悅同感動，至今仍然難忘。

不過，馬拉松唔只有巔峰時刻。2018年嘅波士頓馬拉松，對佢嚟講就係一場極限考驗。當日天氣惡劣，風雨交加，加上氣溫極低，令整場比賽變得異常艱辛。跑到中途，佢都曾經諗過放棄嘅念頭，但最後佢選擇咬緊牙關，繼續向前，完成比賽。「可能呢個就係馬拉松精神——永遠唔好放棄。」無論環境幾困難，都要向住終點進發。

作為經驗豐富嘅跑手，佢坦言訓練最大挑戰唔係一時嘅辛苦，而係長時間嘅堅持。點樣安排每星期嘅跑量、點樣平衡訓練同休息、點樣避免受傷，全部都係學問。「如果復原做得唔好，下一次訓練一定會受影響。」除此之外，心理狀態同樣重要。長期訓練好容易令人感到疲倦甚至厭倦，如果失去對跑步嘅熱情，就會影響整體表現。所以佢一直提醒自己，要保持對跑步嘅初心同熱愛。

展望未來，呂偉強希望可以參加更多世界各地嘅馬拉松賽事，甚至挑戰完成世界八大、九大馬拉松。如果身體狀況許可，佢亦想再次突破個人最佳時間（PB）。不過對佢嚟講，成績從來唔能夠強求，「未過終點一刻，都唔知道結果」，最重要係享受過程，同每一次挑戰自己嘅機會。

最後，佢亦送上一番說話俾有志跑馬拉松嘅年輕人：「最重要係學識調整心態。」因為馬拉松訓練周期長、壓力大，成績亦可能有好大起伏，如果可以處理好心理負擔，對表現一定有幫助。

由每一次訓練，到每一次比賽，呂偉強跑出屬於自己嘅節奏。喺呢條42公里嘅路上，佢唔單止追求速度，更加學識同自己對話。記住——一日終點未到，一切未完。

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意