對空手道運動員鄧宇軒嚟講，空手道從來都唔只係一項運動，更係一場長期嘅自我修練。由細到大，每一個階段佢都面對唔同課題，而空手道教識佢嘅，唔止係技術，仲有點樣面對挑戰、調整心態，一步一步成為而家嘅自己。

佢同空手道嘅緣分，唔單止喺訓練場上，更延伸到家庭之中。由細個開始，一家人一齊喺屋苑練拳、研究技術，到一齊出隊比賽，空手道成為咗佢同屋企人之間最深厚嘅連結。呢種一齊經歷、一齊成長嘅過程，正正令佢真正愛上呢項運動，並決定走上專業道路。

講到運動生涯入面最難忘嘅時刻，鄧宇軒坦言有好多「第一次」——第一次登上世界排名第一、第一次贏得世界搏擊運動會金牌、第一次奪得全青運冠軍。每一個成就都得來不易，但如果要揀一個最難忘同最驕傲嘅時刻，佢會毫不猶豫揀第一次攞亞青冠軍。比賽結束後，佢睇返屋企人喺屋企睇直播嘅片段，見到佢哋激動到喊，甚至第一次見到爸爸流淚，再親耳聽到爸爸媽媽一句「We’re so proud of you」。嗰一刻，對佢嚟講唔單止係勝利，更係作為兒子最值得驕傲嘅時刻。

不過，成為運動員從來都唔容易。鄧宇軒直言，訓練中最大嘅挑戰一定係傷患。細個時候好少受傷，但踏入U21組別開始，要同時應付青年同成人組別賽事，強度倍增，身體負荷亦愈來愈大。喺2023年亞運，更曾經歷一次嚴重傷患，直到而家都未完全康復。但正正因為呢段經歷，令佢更加了解自己身體嘅極限，學識點樣同傷患共存，同時調整步伐繼續向前。

展望未來，佢今年最大嘅目標係希望可以喺亞運舞台上踏上頒獎台。不過，比起成績，佢更重視嘅係好好享受每一場比賽。因為佢相信，只有真正享受每一次出場，先可以發揮出最真實、最強嘅自己。

最後，鄧宇軒亦想同一班懷住空手道夢想嘅年輕人講一句說話：「唔好為自己設限，呢個世界已經有太多枷鎖。如果你有夢，就放膽去試，唔好理人點睇，亦唔好諗會唔會成功，因為唔試就永遠唔會成功。」人生最可惜嘅，從來都唔係失敗，而係留下「What if」嘅遺憾。

由一拳一腳開始，鄧宇軒唔單止打出成績，更一步一步，修練出屬於自己嘅人生。

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意