【沉迷於挑戰自己】

對於當選應屆「四料香港足球先生」嘅港足中場陳肇鈞（Philip）嚟講，足球，絕對唔止係一項運動。「我覺得足球係一種能夠凝聚人心嘅力量。」足球嘅魅力在於其高度競爭性，無論係喺球場上爭奪入球，定係喺看台上呐喊助威，都能夠帶俾參與者一種獨特嘅激動同快感。「作為職業球員，激烈嘅競爭性改變咗我嘅人生，同時影響住我嘅人生態度，要無時無刻裝備好自己。」

自2011年回港展開職業生涯之後，Philip先後轉過9個球會，挑戰自己嘅腳步從不懈怠：「我對挑戰自己呢件事好沉迷，一直會諗點樣再去進步，每日都想更上一層樓。有時辛苦過後見到成績，嗰種滿足同成就感，真係無嘢比得上。」被問到足球生涯中最難忘嘅時刻，Philip 表示近年贏到「香港足球先生」，對佢嚟講意義重大：「呢份榮譽唔單止係一種認同，更重要係我放低咗好多自己俾自己嘅壓力。」

由「少爺仔」到「足球先生」，Philip一路走來，絕不容易。佢堅信唯有唔放棄，先可以一路成長：「希望所有年輕的運動員都能堅持自己嘅理想，唔好因為少少阻滯就放棄。如果發現自己嘅路唔啱，記住要盡早搵解決方法，因為時間係最珍貴嘅資源。」