對呢位港隊排球代表袁思偉嚟講，「排球」從來唔只係一項運動，而係一種推動自己不斷向前嘅動力。由最初接觸排球，到今日成為港隊隊長，佢一直都喺場上場下追逐目標，努力令自己成為一個更出色嘅排球運動員。「每一次完成高強度訓練之後嘅滿足感，同埋贏波嗰刻嘅成就感，真係無價。」正正係呢份純粹嘅快樂，令佢決心將興趣變成專業，喺排球路上走得更遠。

講到難忘時刻，佢話其實每一次著起港隊球衣出賽，都係好值得驕傲嘅時刻。不過，如果要揀一場最深刻嘅比賽，佢提到早前嘅全運會。除咗球隊表現出色、成功擊敗幾支職業隊取得勝仗之外，更重要係今次有部分賽事得到電視直播，令更多香港觀眾可以親眼見證港隊嘅拼搏。「以往排球比賽好少有直播，今次感受到多咗人支持，嗰種感覺好唔同。」對佢嚟講，唔單止係一場比賽，更係一次被看見、被肯定嘅經歷。

不過，要走上專業運動員之路從來唔容易。佢坦言，最大挑戰係身份之間嘅平衡——日頭係全職上班族，夜晚就投入高強度訓練，無論體力定意志力都係極大考驗。加上香港排球發展仍未完全職業化，無論場地、資源定訓練時間都有限，要同其他擁有完善聯賽體系嘅地區競爭，球員唯有靠自律同熱誠去追趕。「好多時都係靠一份堅持，逼自己完成每一課訓練。」呢種日復日嘅努力，正正係支撐佢走到今日嘅原因。

展望未來，佢希望短期內可以同港隊一齊踏上名古屋亞運嘅舞台，同男排「黃金一代」喺四年一度嘅大賽上全力一拼。長遠嚟講，佢亦希望透過自己喺本地排球壇嘅影響力，吸引更多年輕人接觸同愛上排球，令呢項運動喺香港有更好發展。

最後，佢亦送上一句說話俾一班正在追夢嘅年輕運動員：「記得為自己訂立目標，令你每一日都有動力起身前進。」同時亦要學識享受過程中嘅高低起伏，因為每一次經歷，其實都喺塑造緊一個更強大嘅自己。

由日頭嘅工作，到夜晚嘅訓練；由每一次接發球，到每一場硬仗，佢用行動證明——夢想唔係等返嚟，而係一球一球拼返嚟。只要未完場，就仲有機會。

相關文章：逆境中成長．用心打每一球｜譚竣顥：排球唔只係運動，而係我嘅人生導師

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意