對港隊乒乓球運動員吳詠琳嚟講，「乒乓球」從來唔只係對手之間嘅較量嘅運動，而係一面鏡，令佢不斷了解自己、探索自己。「其實我係因為哥哥打波，我喺隔離執波先接觸到乒乓球。」由最初只係陪伴，到後來越打越好，佢嘅路其實一步步走得好自然。細個已經活躍於唔同運動，游泳、田徑、欖球、跳繩、花式溜冰樣樣都有涉獵，但偏偏係乒乓球成績一路突圍，由青苗、少兒精英隊，到入選香港青少年隊，慢慢將重心放喺呢項運動上，亦正式踏上競技之路。

講到最難忘嘅時刻，佢提到2024年混合團體世界盃。當時佢同混雙拍檔之前表現未算理想，但喺關鍵賽事臨危受命，壓力爆燈。「真係好緊張，但無諗過我哋可以喺壓力之下打出超水平發揮。」最終成功為團隊取得優勢，加上隊友們嘅努力，港隊歷史性奪得銅牌。對佢嚟講，最深刻唔單止係成績，而係全隊嘅氣氛，每一分都有人全力吶喊、打氣，有隊友甚至叫到失聲。「嗰種團魂，真係會令人覺得我哋可以創造奇蹟。」熱血程度，至今仍然歷歷在目。

而2025年世大運，對佢嚟講更加係一個突破。女團同女單雙雙奪銅，尤其係女單獎牌，係歷史性一刻。「2023年其實我都有攞過女團銅牌，但當時無喺關鍵時刻上場。但今次係以一號主力身份幫團隊攞分，感覺完全唔同。」由旁觀到主力，由參與到承擔，呢份成長令佢特別自豪，而女單獎牌更令佢至今仍覺得有啲不可思議。

不過，風光背後，從來都唔係一條易行嘅路。對吳詠琳嚟講，最大挑戰唔係技術，而係心態。「最難係調整心態：努力後成績未如理想，就要冷靜反思、繼續專注訓練解決問題，而唔係繼續沉寂係一次失利當中。」佢回憶2024年WTT新加坡大滿貫，女單落敗之後好崩潰，甚至打電話畀屋企人話想退役。「嗰次係我人生喊得最耐、最痛苦嘅一次。」但正正係呢個低谷，令佢重新審視自己。多得師姐同教練嘅開解，加上家人一直以來嘅支持同無對佢施加壓力，佢最終重新振作，並喺同年尾迎來突破性成績。跌過，先學識點樣再起身。

展望未來，佢對自己有好清晰嘅方向。短期希望可以調整好心態，更加相信自己，以更積極嘅狀態面對每一日訓練，同時喺世錦賽同亞運會衝擊八強，力爭獎牌。長遠目標，就係2028年奧運爭取參賽資格之餘，目標直指八強甚至更高位置。為港爭光，對佢嚟講唔只係口號，而係一步一步用實力去實現嘅承諾。

最後，佢亦送上一句說話俾所有追夢中嘅年輕運動員：「老天爺唔會畀你一個你戰勝唔到嘅困難。」佢坦言，追夢一定會遇到比想像中更多嘅挫折，但正正係每一次跌低、每一次突破，先會構成真正嘅成長。「當你回頭望返，你會覺得一切努力嘅汗水同不甘心嘅淚水，都係值得嘅。」只要繼續相信自己，努力搵方法突破，每一個人都有機會成為更強嘅自己。

由執波開始，到站上世界舞台；由崩潰邊緣，到再次突破，吳詠琳用行動證明——真正嘅強大，唔只係技術，而係喺低谷入面，仍然選擇相信自己。

相關文章：雙重身份嘅堅持｜日與夜之間全力以赴｜袁思偉：追逐目標，成就更好嘅自己

相關文章：逆境中成長．用心打每一球｜譚竣顥：排球唔只係運動，而係我嘅人生導師

相關文章：飛越沙池．突破紀錄｜陳銘泰：有時最重要唔係完美準備，而係正確心態。

相關文章：跳過高度．跨越無悔｜鍾慧欣：跳高比賽以失敗嘅最後一杆作結，卻令人想再跳一次。

相關文章：一劍一念．心戰無悔｜梁千雨：請記得盡情享受追夢嘅過程，搏盡無悔。

相關文章：一球一念．挑戰高牆｜江卓軒：由「型」開始，打出全運會歷史佳績。

相關文章：堅持搏盡．踢出高峰｜盧蔚豐：跆拳道教我自信樂觀，改變咗我嘅人生

相關文章：由街場到啟業活化：香港街籃精神與城市創意